Isang lalaki mula General Santos City ang pinatay at ninakawan ng motorsiklo sa Brgy. Tuka, Mamasapano, Maguindanao del Sur hapon ng Martes.
Kinilala ng pulisya ang biktima na si Saripudin Tumbaga Andang, 45-anyos at residente ng Solidad Estate, City Heights, General Santos City.
Ayon kay Maguindanao del Sur PNP Director Col. Ryan Bobby Paloma, binabaybay ng biktima ang daan mula Brgy. Libutan patungo sa Brgy. Sapakan sakay ng kanyang itim na Yamaha NMAX nang tambangan siya ng dalawang armadong lalaki na sakay ng isang Suzuki Raider 150.
Pinagbabaril ang biktima sa iba’t ibang bahagi ng katawan na agad nitong ikinamatay.
Matapos ang krimen, kinuha ng mga suspek ang motorsiklo ng biktima at mabilis na tumakas patungo sa Brgy. Tukanalipao, isang lugar na ayon sa PNP ay pinamumugaran ng mga kasapi ng MILF at BIFF.
Patuloy ang imbestigasyon ng mga awtoridad upang matukoy ang mga salarin at alamin ang motibo sa krimen.
