Isang lalaki ang nasawi matapos masangkot sa matinding aksidente ang minamaneho nitong motorsiklo sa National Highway, Brgy. Digal, Buluan, Maguindanao del Sur bandang alas-7 ng gabi.
Kinilala ang biktima bilang si Boy Datang, nasa hustong gulang, may asawa, at residente ng Brgy. Datang, Datu Paglas sa naturang lalawigan.
Batay sa imbestigasyon, pauwi na si Datang mula sa isang resort sa M’lang, North Cotabato nang maganap ang trahedya. Sa mabilis nitong pagmamaneho, hindi na niya naiwasang sumalpok sa isang dump truck na may kargang palm oil.
Sa lakas ng banggaan, tumilapon ang biktima at nagtamo ng matinding pinsala sa katawan, kabilang ang malubhang sugat sa ulo at pagkapinsala ng kanyang mga paa. Sa kabila ng pagsisikap na maisalba ang kanyang buhay, hindi na siya umabot nang buhay sa ospital.
Patuloy namang iniimbestigahan ng mga awtoridad ang insidente upang matukoy ang iba pang posibleng dahilan ng aksidente.
