Isinusulong sa Bangsamoro Transition Authority (BTA) ang panukalang batas na magbibigay ng libreng tanghalian para sa lahat ng mag-aaral sa kindergarten at elementarya sa mga pampublikong paaralan sa buong rehiyon ng BARMM.
Ang panukala ay inihain nina Members of Parliament Baintan A. Ampatuan at Rasol Y. Mitmug, Jr.
Layon ng panukalang ito na tugunan ang problema sa malnutrisyon, pataasin ang antas ng edukasyon, at himukin ang mga kabataan na pumasok at manatili sa paaralan sa pamamagitan ng pagkakaloob ng libreng pagkain tuwing tanghalian.
Kasama sa panukalang batas ang paglalaan ng pondo para maisakatuparan ang programa at matiyak na ito ay magiging tuloy-tuloy at makakaabot sa mga paaralan sa pinakamalayong bahagi ng rehiyon.
Kabilang sa mga co-authors ng panukala ang ilang mambabatas ng BTA tulad nina MPs Amilbahar Mawallil, Laisa Alamia, Suharto Ambolodto, Don Mustapha Loong, Rasul Ismael, Khalid Hadji Abdullah, at iba pa.
Ang naturang panukala ay isang bahagi ng mas malawak na inisyatibo ng BTA upang mapabuti ang kalidad ng edukasyon at kabuhayan ng mga batang Bangsamoro.
Sa oras na maisabatas, ang libreng tanghalian ay inaasahang magdudulot ng positibong epekto sa kalusugan, konsentrasyon, at pangkalahatang pagganap ng mga mag-aaral sa klase.
