Nilinaw ng Malacañang na ang Enero 27, 2025, ay hindi idineklarang national holiday.
Sa halip, ito ay isang espesyal na Muslim holiday na ipagdiriwang lamang sa Bangsamoro Autonomous Region in Muslim Mindanao (BARMM) bilang paggunita sa mahalagang selebrasyon ng Al Isra Wal Mi’raj.
Ayon sa pahayag mula sa tanggapan ni Executive Secretary Lucas Bersamin, ang nasabing araw ay hindi saklaw ng buong Pilipinas, kundi eksklusibo lamang sa mga lugar na kabilang sa BARMM.
Dagdag pa nito, ang mga Muslim na nasa ibang bahagi ng bansa, tulad ng National Capital Region (NCR), ay maaaring hindi obligadong pumasok sa trabaho kung nais nilang ipagdiwang ang okasyong ito.
Ang Al Isra Wal Mi’raj ay isa sa mga mahalagang pagdiriwang sa pananampalatayang Islam. Ito ang araw na ginugunita ang mahimalang paglalakbay at pag-akyat ni Propeta Muhammad sa langit.
Isang mahalagang bahagi ito ng kasaysayan ng Islam na nagbibigay inspirasyon at higit na nagpapatibay ng pananampalataya ng mga Muslim sa buong mundo. Ipinaalala ng pamahalaan na ang pagdiriwang ng Al Isra Wal Mi’raj ay alinsunod sa Presidential Decree No. 1083 o ang “Code of Muslim Personal Laws of the Philippines.”
Sa ilalim ng batas na ito, binibigyang pagkilala ang mga Muslim holidays bilang bahagi ng kanilang tradisyon at pananampalataya.
Samantala, hinikayat ng Malacañang ang mga Pilipino na igalang ang paniniwala at tradisyon ng mga kapatid na Muslim.
Para naman sa mga employer sa mga lugar kung saan hindi holiday, pinapayuhan ang mga ito na unawain ang mga Muslim na nais gunitain ang okasyong ito.
Ang BARMM, na binubuo ng mga probinsya tulad ng Maguindanao, Lanao del Sur, Basilan, Sulu, at Tawi-Tawi, ay binigyan ng awtonomiya upang mas mapanatili at maisulong ang kanilang kultura at tradisyon.
Sa ganitong mga selebrasyon, pinapakita ang pagkakaiba-iba ng ating bansa bilang isang multikultural na lipunan.
Hinihikayat din ng gobyerno ang publiko na patuloy na magkaisa at magtulungan sa gitna ng ating pagkakaiba, na nagpapalakas sa ating bansa bilang isang buong sambayanan.
