Mahigit 300 estudyante ng Puntor Primary School sa Barangay Nabalawag, Barira, Maguindanao del Norte ang tumanggap ng mga bagong storybook at learning materials sa isang makabuluhang turnover ceremony na ginanap mismo sa kanilang paaralan.
Ang proyektong ito ay hatid ng Books for a Cause, isang non-profit organization na nagsusulong ng literacy at edukasyon sa mga liblib at underserved na komunidad sa buong bansa. Layunin ng donasyon na mas mapaigting pa ang kakayahan ng mga batang magbasa at matuto sa pamamagitan ng de-kalidad na babasahin.
Hindi naging madali ang paghahatid ng mga kagamitan, ngunit matagumpay itong naisakatuparan sa tulong ng The Climbing Puppeteer, Marine Battalion Landing Team-2 (MBLT-2), at 1st Marine Brigade. Sa kanilang sama-samang pagsusumikap, ligtas at maayos na naipamahagi ang mga aklat sa mga mag-aaral.
Pinatunayan ng inisyatibang ito na sa tulong ng pagkakaisa at malasakit, kayang abutin ang bawat batang nangangarap—kahit sa pinakaliblib na bahagi ng bansa. Sa bawat pahina ng libro, binubuo ang kinabukasan ng kabataang Pilipino.
