Isinagawa noong Pebrero 26, 2026 ang isang Information, Education and Communication (IEC) Campaign at mass intake ng amnesty applications para sa mga kasapi ng Moro Islamic Liberation Front (MILF) sa Municipal Gymnasium ng Mamasapano, Maguindanao del Sur.
Dumalo sa aktibidad sina MGen. Patricio Ruben P. Amata, Deputy Chief of Staff for Civil-Military Operations (J7) at Chairperson ng Government Peace Panel Coordinating Committee on the Cessation of Hostilities; BGen. Edgar L. Catu, Commander ng 601st Infantry Brigade; at Lt. Col. Edgardo B. Batinay, Commanding Officer ng 34th Infantry Battalion.
Pinangunahan ang programa ni Mamasapano Mayor Akmad Ampatuan katuwang ang National Amnesty Commission at iba pang stakeholders sa peace process. Naroon din sina Charmaine Ann A. Valenzuela, Attorney IV ng National Amnesty Commission; Anwar P. Alamada, Chairperson ng MILF AdHoc Joint Action Group (AHJAG); at Ustadz Abdul Wahid Tundok, Commander ng 118th Base Command, BIAF/MILF.
Batay sa inisyal na ulat, 42 miyembro ng MILF ang nagsumite ng kanilang aplikasyon para sa amnesty sa naturang aktibidad.
Layunin ng programa na magbigay ng impormasyon tungkol sa amnesty process at mapadali ang pagsusumite ng aplikasyon ng mga kwalipikadong indibidwal. Bahagi ito ng normalization process sa ilalim ng umiiral na peace agreement sa Bangsamoro region.
Sa kanyang pahayag, sinabi ni BGen. Catu na patuloy ang suporta ng 601st Infantry Brigade sa implementasyon ng amnesty program bilang bahagi ng normalization efforts. Samantala, binigyang-diin din ni MGen. Jose Vladimir R. Cagara, Commander ng Joint Task Force Central at 6th Infantry Division, ang kahalagahan ng amnesty bilang mekanismo para sa reintegration at pagkakasundo.
Ang isinagawang IEC campaign at mass intake ay bahagi ng patuloy na koordinasyon ng pamahalaan, security sector, at MILF sa pagpapatupad ng mga hakbang kaugnay ng peace process sa Bangsamoro Autonomous Region in Muslim Mindanao.
