Nagpakita ng matibay na suporta ang grupo ng mga retiradong opisyal ng Philippine Army, sa pangunguna ni Ret. Colonel Ismael T. Malingco, para sa pamunuan ng Moro Islamic Liberation Front (MILF) at sa United Bangsamoro Justice Party (UBJP).
Sa kanilang pagbisita, tiniyak ng mga dating opisyal ng militar ang kanilang pakikiisa sa mga adhikain ng MILF at UBJP para sa pangmatagalang kapayapaan, kaunlaran, at katatagan ng Bangsamoro. Giit nila, hindi lamang ito usapin ng pulitika kundi bahagi ng kanilang personal na pangarap para sa lugar na kanilang tahanan, kung saan nakatira ang kanilang mga pamilya at nakaugat ang kanilang kinabukasan.
Pinapurihan ng pamunuan ng MILF ang ipinakitang malasakit at pakikiisa ng mga retiradong opisyal. Ayon sa kanilang pahayag, ang nasabing pagbisita ay itinuturing na simula ng mas marami pang makabuluhang diyalogo at pakikipag-ugnayan, na inaasahang magpapatibay sa sama-samang pagsisikap tungo sa pagkakaisa at pagkakasundo ng Bangsamoro.
