Mas pinaigting ang suporta sa edukasyon sa Bangsamoro matapos isama sa distribusyon ng school support materials ang ilang kampo ng MILF at MNLF kabilang ang Camp Abubacar, Camp Maton, Mohammad Al-Baseer Militon Camp sa Rajahmuda, 103 Darul Hijrah Base Command at 121 Base Command Camp Jabidah sa Camp Bushra.
Saklaw naman ng programang Bangsamoro Youth Volunteers Program o BYVP ang mga munisipyo ng Datu Piang, Datu Unsay, Shariff Aguak, Datu Salibo, Datu Saudi Ampatuan, Rajah Buayan, Mamasapano, at Shariff Saydona Mustapha kung saan ipagkakaloob ang mga upuan, blackboards, pintura at iba pang school supplies.
Bahagi ang inisyatibong ito ng patuloy na suporta ng Bangsamoro Youth Commission sa mga proyektong nagtapos sa ilalim ng Special Development Fund mula sa Office of the Chief Minister at ngayon ay pinapalakas sa tulong ng United Nations Development Programme o UNDP at iba pang development partners.
Ayon kay Chairperson at Commissioner for Maguindanao with Cotabato City at SGA Nas Dunding, patuloy ang pagsisikap ng Pamahalaang Bangsamoro na maglatag ng tuloy-tuloy na intervention sa mga short-term projects para sa kapakanan ng kabataan sa mga kampo ng MILF at MNLF at sa mga out-of-school youth sa conflict-affected areas ng rehiyon.
