Bumisita si Australian Ambassador to the Philippines Marc Innes-Brown sa Camp Siongco, Awang, Datu Odin Sinsuat, noong Nobyembre 26, 2025, para sa isang pagpupulong ukol sa seguridad at posibleng kooperasyon sa pagitan ng Australian at Philippine Army.
Mainit siyang tinanggap ni Major General Jose Vladimir Cagara, Commander ng 6th Infantry (Kampilan) Division at Joint Task Force Central (JTFC), sa Command Administration Building. Kasama ng mga senior officers, tinalakay ang mga security protocols at koordinasyon na maaaring suportahan ang operasyon ng Philippine Army sa rehiyon.
Ayon kay Ambassador Innes-Brown, mahalaga ang paghahanda at maayos na seguridad upang maprotektahan ang mga komunidad, at dapat laging adaptive at dynamic ang mga pamamaraan sa seguridad. Sinabi naman ni Maj. Gen. Cagara na patuloy nilang sinusuri at pinapalakas ang kanilang kakayahan upang matugunan ang mga pangangailangan ng seguridad sa Central at South-Central Mindanao.
Bago ang kanyang pagbisita, nagsilbi si Ambassador Innes-Brown bilang Assistant Secretary ng Australian Department of Foreign Affairs and Trade (DFAT), na nangangasiwa sa foreign policy at international relations ng Australia. Ang kanyang pagbisita ay nakatuon sa pagpapatibay ng koordinasyon sa seguridad sa pagitan ng dalawang bansa, lalo na sa pagpapanatili ng katatagan at kapayapaan sa rehiyon.
