Sinagip ng Philippine Coast Guard ang isang nawawalang crew member mula sa fishing boat na FBCA Gavin sa karagatan malapit sa Silanguin Island, Zambales nitong Huwebes.
Kinilala ang crew member na si Larry Tumalis, na nawala noong Disyembre 24, 2025 matapos sumakay sa maliit na bangka mula sa mother boat upang mangisda. Sa kabila ng agarang paghahanap ng kanyang mga kasama, hindi siya natagpuan sa unang pagsisikap.
Matapos matanggap ang ulat noong Disyembre 25, inilunsad ng PCG ang barkong BRP Cape San Agustin para sa rescue operation. Pagkaraan ng tatlong oras na paghahanap, matagumpay na nasagip si Tumalis at agad nabigyan ng medikal at psychosocial na suporta upang matiyak ang kanyang kaligtasan.
