Isang Overseas Filipino Worker (OFW) na kinilalang si alyas “Losamath,” tubong Barangay Dumadalig, Tantangan, South Cotabato, ang natagpuang patay sa kaniyang tinutuluyang bahay sa Saudi Arabia.
Sa paunang ulat, tumangging magbigay ng karagdagang detalye ang pamilya at mga malalapit sa biktima, ngunit kinumpirma nilang matagal nang humaharap sa matinding stress at depresyon ang nasabing OFW bago ang insidente.
Samantala, umani ng matinding batikos mula sa publiko ang isang vlogger na umano’y gumawa ng video content tungkol sa personal na buhay ng biktima. Ayon sa mga netizen, kahit alam ng content creator na sensitibo ang isyung tinatalakay, ipinilit pa ring ibahagi ito sa social media — bagay na tinuligsa ng marami bilang hindi makatao at hindi angkop.
Maraming netizens ang nagpahayag ng pagkadismaya, sinasabing ang naturang content ay nagdagdag pa sa sakit ng kalooban ng mga naiwan ng biktima.
Sa ngayon, nagsasagawa na ng masusing imbestigasyon ang Embahada ng Pilipinas sa Saudi Arabia upang matukoy ang tunay na dahilan ng pagkamatay ni Losamath.
Nanawagan naman ang mga awtoridad sa publiko na maging maingat at responsable sa paggamit ng social media, lalo na sa paglalathala ng mga sensitibong impormasyon.
Samantala, nananawagan ng hustisya ang pamilya ng biktima at hinihiling ang respeto sa kanilang pagdadalamhati.
