Matagumpay na naisakatuparan ng Philippine National Police-Women and Children Protection Center (PNP-WCPC), sa pakikipagtulungan ng Mindanao Field Unit (MFU), ang tatlong magkakasabay na high-impact operations sa Lungsod ng Mati, Davao Oriental laban sa Online Sexual Abuse and Exploitation of Children (OSAEC) at Child Sexual Abuse or Exploitation Materials (CSAEM).
Pinagsama sa mga operasyon ang entrapment, rescue missions, at ang pagpapatupad ng Warrants to Search, Seize, and Examine Computer Data (WSSECD), na nagpakita ng maagap at sistematikong aksyon ng PNP upang maprotektahan ang mga batang biktima.
Bunga ng mga hakbang na ito, labing-isang (11) bata ang nailigtas, kabilang ang walong babae pitong menor de edad at isa na nasa wastong gulang at tatlong batang nanganganib. Tatlo ang naaresto: dalawang adult at isang 17-anyos na babae na menor de edad na dinala sa pangangalaga bilang Child in Conflict with the Law (CICL). Nakalap din ng mga awtoridad ang digital at non-digital na ebidensya na nag-uugnay sa mga suspek sa kaso ng OSAEC at CSAEM.
Matapos ang pagpapatupad ng mga warrant, dinala ang mga arestado sa himpilan ng pulisya para sa dokumentasyon at legal na proseso. Ang mga CICL at mga nailigtas na bata ay agad na ipinasa sa City Social Welfare and Development Office (CSWDO) para sa assessment, psychosocial support, at pangmatagalang proteksyon.
Binigyang-diin ni Acting Chief PNP, PLTGEN Jose Melencio C. Nartatez, Jr., ang determinasyon ng PNP sa pagsugpo sa ganitong krimen:
“Ang proteksyon sa ating mga kabataan ay hindi mapag-uusapan. Ipinapakita ng mga operasyong ito na walang ititigil ang PNP sa pagliligtas sa mga biktima at paghahabol sa mga may sala. Bawat batang mailigtas ay buhay na naibabalik, at bawat suspek na nahuhuli ay malinaw na mensahe: hindi pinapayagan ang pang-aabuso.”
Ayon kay PLTGEN Nartatez, nakahanay ang mga operasyon sa bisyon ni Pangulong Ferdinand R. Marcos Jr. at sa prinsipyo ng PNP: “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Maaaring maharap sa life imprisonment at multa hanggang ₱5 milyon ang mga suspek, depende sa bigat ng kaso.
Dagdag pa niya: “Ang ating kabataan ang pinakamahalagang yaman ng bansa. Ang iligtas sila sa panganib ay hindi lamang tungkulin ito rin ay responsibilidad namin. Patuloy na poprotektahan, aalagaan, at ililigtas ng PNP ang bawat batang nangangailangan.”
