Isang pinagsanib na operasyon ng mga otoridad ang isinagawa sa Barangay Korosoyan, Barira, Maguindanao del Norte nitong gabi ng Hulyo 17, 2025. Pangunahing pinangunahan ito ng CIDG Regional Field Unit BARMM at Barira Municipal Police Station, katuwang ang Marine Battalion Landing Team-2.
Target ng operasyon ang isang armadong grupong kriminal na pinamumunuan umano ng isang alyas Ragundo. Kilala ang grupo sa mga bayan ng Barira, Matanog, Parang, Sultan Mastura, at Buldon dahil sa pagkakasangkot sa seryosong krimen tulad ng pagnanakaw, kidnapping, gun-for-hire, ilegal na droga, at sunod-sunod na kaso ng pagpatay.
May mga nakabinbing warrant of arrest si alyas Ragundo sa mga kasong frustrated murder, robbery, at murder.
Sa operasyon, nakumpiska ang ilang matataas na kalibreng baril, bala, granada, at iba pang gamit pandigma. Ayon sa mga otoridad, malaki ang epekto ng operasyon sa pagpigil sa mga kriminal na aktibidad at pagbabalik ng katahimikan sa komunidad.
Nagpapasalamat din ang mga otoridad sa suporta ng lokal na pamahalaan ng Barira at mga residente na nakatulong para maisagawa ang operasyon nang ligtas at matagumpay. Dahil dito, mas magiging ligtas na umano ang pamumuhay ng mga mamamayan sa mga apektadong lugar.
