Arestado ang isang 24-anyos na babae sa Cotabato City matapos maaktuhan umano sa pag-aalok ng panandaliang aliw sa pamamagitan ng internet.
Kinilala ng Regional Anti-Cybercrime Unit–Bangsamoro Autonomous Region ang suspek sa alyas na Magdalena.
Ayon sa imbestigasyon, gumagamit umano ito ng social media at online platforms para mag-alok ng seksuwal na serbisyo, dahilan para masampahan ng kasong prostitusyon sa ilalim ng Cybercrime Prevention Act of 2012 o R.A. 10175.
Ayon kay Regional Anti-Cybercrime Group Director, PBGen. Bernard Yang, patuloy nilang binabantayan ang mga iligal na aktibidad online, lalo na kung may kinalaman sa pananamantala sa kababaihan.
Hinikayat din niya ang publiko na agad i-report sa kanilang tanggapan ang anumang kahalintulad na krimen sa internet, at tiniyak na mananatiling kumpidensyal ang pagkakakilanlan ng mga magrereklamo.
