Mariing kinokondena ng Pamahalaang Bangsamoro ang walang awang pagpatay kay Ramon Lupos, isang lider ng Non-Moro Indigenous Peoples (NMIP) at kasapi ng tribong Teduray, na pinaslang noong Setyembre 30, 2025 sa Barangay Limpongo, Datu Hofer, Maguindanao del Sur.
Ayon sa pamahalaan, ang naturang karumal-dumal na krimen ay isang malinaw na pagsuway sa kapayapaan, katarungan, at dangal ng tao. Ipinapaabot nito ang taos-pusong pakikiramay sa pamilya ni Lupos at sa buong pamayanang Teduray.
Kasabay nito, inatasan ng Punong Ministro Hon. Abdulraof A. Macacua ang mga ahensya ng seguridad at pagpapatupad ng batas na magsagawa ng masusing imbestigasyon, agad papanagutin ang mga salarin, at tiyakin ang kaligtasan ng lahat ng katutubo sa rehiyon.
Nagpahayag din ang Pamahalaang Bangsamoro na ang insidenteng ito, na naganap kasabay ng pagdiriwang ng Indigenous Peoples Month ngayong Oktubre, ay paalala ng patuloy na hamon ng mga kawalang-katarungang nararanasan ng mga katutubo.
Bilang pagkilala sa alaala ni Ramon Lupos, muling tiniyak ng pamahalaan ang kanilang paninindigan na walang humpay na ipaglalaban ang katarungan—hindi lamang para kay Lupos at sa kanyang pamilya, kundi para rin sa lahat ng Indigenous Peoples na naghahangad ng kapayapaan, dangal, at proteksyon sa lupang tinubuan.
