Nahuli ng Philippine National Police ang malaking shipment ng ilegal na sigarilyo sa isang follow-up operation sa Tarlac City, bilang pagpapatuloy ng kanilang kampanya laban sa smuggling.
Sa pangunguna ni PNP Chief, Police General Jose Melencio C. Nartatez Jr., isinagawa ang operasyon mula 10:00 PM ng Pebrero 9 hanggang 10:00 AM ng Pebrero 10, 2026, sa Sitio Pag-asa, Sinipit, Barangay Tibag.
Pinangunahan ng CIDG Tarlac Provincial Field Unit ang joint operation, na sinuportahan ng CIDG Bulacan PFU, Tarlac City Police Station, Tarlac Police Provincial Office, PIU Tarlac, PMFTC, at Philippine Tobacco Institute. Ito ay karugtong ng buy-bust noong Pebrero 8 na nagresulta sa apat na pag-aresto sa paglabag sa RA 10643, RA 7394, at RA 8293.
Sa follow-up operation, hindi nagpakita ang pinaghihinalaang supplier sa itinakdang lugar. Ngunit sa patuloy na pag-iikot, natuklasan ng mga pulis ang isang Wing Van at Closed Van na puno ng mga kahon ng smuggled branded cigarettes, na walang nakabantay sa mga sasakyan.
Na-inventory ang 683 master cases ng ilegal na sigarilyo, na nagkakahalaga ng tinatayang ₱47,530,000.00, at isinailalim sa CIDG Tarlac para sa dokumentasyon at legal na disposisyon. Patuloy ang imbestigasyon ng PNP upang tuklasin at mahuli ang supplier na nasa likod ng smuggling operation.
Ayon kay PNP Chief PGEN Nartatez “Hindi gagalaw ang ilegal na smuggling sa ilalim ng aming pamamahala. Susundan namin ang bawat sangkot at ipatutupad ang batas nang walang paligoy-ligoy. Walang makakalusot; mananagot ang lahat.”
“Agad kikilos ang PNP laban sa illegal trade at para protektahan ang mamamayan. Ang lumalabag sa batas at sumasamantala sa kabuhayan ng tao ay haharap sa hustisya.” dagdag pa nya
Ang operasyon ay bahagi ng Focused Agenda ng PNP, na layong gawing mas kredible at maaasahan ang serbisyo-pulis. Kasabay nito, tiniyak ng tanggapan ang tuloy-tuloy na kampanya kontra smuggling sa ilalim ng direktiba ni Pangulong Ferdinand R. Marcos Jr., bilang bahagi ng “Bagong PNP para sa Bagong Pilipinas: Serbisyong mabilis, tapat, at nararamdaman.”
