Mariing kinondena ng Police Regional Office Bangsamoro Autonomous Region (PRO BAR) ang naganap na pagsabog sa Shariff Aguak at mga insidente ng pamamaril sa Mamasapano at Buluan, Maguindanao del Sur. Ayon kay PBGEN Jaysen C. De Guzman, Regional Director ng PRO BAR, ang mga karahasang ito ay malinaw na pag-atake sa kapayapaan at kaligtasan ng mga komunidad.
Kasalukuyang isinasagawa ang masusing imbestigasyon, at katuwang ang lokal na pamahalaan, aktibong tinutukoy at hinuhuli ng kapulisan ang mga responsable. Tiniyak ni De Guzman na papanagutin sa batas ang lahat ng sangkot.
Nanawagan din ang PRO BAR sa publiko na maging mapagmatyag at makipagtulungan sa mga awtoridad sa pag-uulat ng anumang kahina-hinalang gawain upang maiwasan ang karagdagang insidente at masiguro ang mabilis na katarungan.
Ayon sa opisyal, nananatili ang matatag na paninindigan ng PRO BAR sa pagpapanatili ng kapayapaan at seguridad sa Maguindanao del Sur at sa patuloy na proteksyon sa bawat mamamayan ng rehiyong Bangsamoro.
