Isang 18-anyos na senior high school student ang nasawi matapos pagbabarilin ng hindi pa nakikilalang suspek sa Barangay Silik, Pikit, North Cotabato bandang alas-12:30 ng tanghali ngayong Marso 15, 2025.
Kinilala ang biktima na si Norman Mangalangkat Kanapia, Grade 11 student ng Silik National High School at residente ng Barangay Langayen sa nasabing bayan.
Batay sa impormasyon mula sa kaanak ng biktima, nagtungo lamang umano si Kanapia sa lugar upang kunin ang isang parcel habang sakay ng kanyang motorsiklong Honda Click 125. Pagdating sa lugar, bigla na lamang siyang nilapitan ng suspek at pinagbabaril ng sunod-sunod.
Tinamaan si Kanapia sa ulo at katawan na naging sanhi ng kanyang agarang pagkamatay sa pinangyarihan ng insidente.
Mabilis namang tumakas ang suspek matapos maisagawa ang krimen.
Patuloy ang imbestigasyon ng mga awtoridad upang matukoy ang motibo at pagkakakilanlan ng suspek. Samantala, nananawagan ng hustisya ang pamilya ng biktima at umaasang agad itong makakamtan.
