Pumanaw na si Aimee Paz Lamasan, Vice Mayor ng Dueñas, Iloilo, matapos siyang maaksidente sa pamamaril sa loob ng kanyang tahanan, ayon sa kumpirmasyon ng kanyang pamilya.
Naganap ang insidente noong Disyembre 30, bandang alas-7 ng umaga sa Puerto Real de Iloilo Subdivision, La Paz, Iloilo City. Agad siyang dinala sa ospital at sumailalim sa dalawang operasyon para mailigtas ang buhay, matapos tamaan ng bala sa kanang bahagi ng tiyan.
Sa kabila ng agarang medikal na atensyon, hindi na nakaligtas si Lamasan sa komplikasyon dulot ng sugat na natamo.
Ang kanyang biglaang pagpanaw ay nagdulot ng labis na lungkot sa mga residente, kapwa opisyal, at mga kaanak.
Patuloy pa rin ang imbestigasyon ng mga awtoridad upang matukoy ang buong detalye ng insidente at matiyak kung paano nangyari ang aksidente sa loob ng kanyang tahanan.
