Lumakas pa si Typhoon Gorio (PODUL) at papalapit nang mag-landfall sa Southern Taiwan. Huling namataan ang sentro nito alas-10 ng umaga sa layong 160 km hilaga ng Itbayat, Batanes, taglay ang pinakamalakas na hangin na 155 km/h at bugso na hanggang 215 km/h, habang kumikilos pa-kanluran sa bilis na 25 km/h.
Itinaas ang Tropical Cyclone Wind Signal No. 2 sa Itbayat, Batanes, habang Signal No. 1 naman sa natitirang bahagi ng Batanes. Inaasahan ang malalakas na hangin at posibleng pagbaha sa baybayin dahil sa mataas na alon. May Gale Warning din sa mga baybaying dagat ng Extreme Northern Luzon, na maaaring umabot sa taas na 8.5 metro ang mga alon. Mapanganib ang paglalayag sa lahat ng uri ng sasakyang pandagat.
Patuloy na umiigting ang Southwest Monsoon na magdadala ng malakas na hangin at pag-ulan sa Babuyan Islands, hilagang Cagayan, silangang Isabela, at hilagang Ilocos Norte. Inaasahang lalabas ng Philippine Area of Responsibility si Gorio ngayong hapon o gabi. Pinapayuhan ang publiko at mga lokal na awtoridad na magpatupad ng kaukulang paghahanda at sundin ang abiso ng PAGASA at lokal na pamahalaan.
