Naaresto ng Criminal Investigation and Detection Group (CIDG) ang isang Amerikanong lalaki na umano’y lider ng National Democratic Front (NDF) sa rehiyon ng MIMAROPA dahil sa umano’y kasong pagpatay at ilegal na pag-aari ng armas.
Ayon sa ulat, isinagawa ng CIDG, katuwang ang Special Action Force, National Intelligence Coordinating Agency, Philippine Army, Philippine Coast Guard, at mga provincial field units ng Batangas at Laguna, ang isang search warrant sa Sitio Pamikalan, Brgy. San Vicente, Abra de Ilog, Occidental Mindoro noong Disyembre 23, 2025, mula 4:05 ng umaga hanggang 1:13 ng hapon. Dito ay naaresto ang suspek na si “Ramon,” 57 taong gulang, US citizen, at residente ng naturang barangay.
Nakumpiska sa kanya ang isang kalibreng .45 pistol, isang kalibreng .22 rifle, assorted magazines, maraming bala, at labing-isang handheld radio. Ayon sa ulat, ang suspek ay may koneksyon sa Communist Terrorist Group (CTG) at itinuturing na tagapag-ingat ng mga armas na walang lisensya para sa paggamit ng NDF.
Si Ramon ay dating tumakbo sa pagka-mayor ng Abra de Ilog noong 2022 at 2025 ngunit natalo. Siya rin ay co-accused ni Gregorio Rosal sa mga kasong murder at apat na kaso ng frustrated murder na inisyu ng Mamburao, Occidental Mindoro noong Abril 21, 2006.
Pinuri ng CIDG ang Regional Chief ng CIDG 4A na si PLTCOL Ganaban C. Ali, pati na rin ang CIDG DSOU na pinamumunuan ni PLTCOL Gene M. Licud, CIDG Batangas sa pamumuno ni PMAJ Deni Mari O. Pedrozo, at CIDG Laguna sa pamumuno ni PMAJ Ivan S. Soriano, kasama ang lahat ng katuwang na yunit sa matagumpay na intelligence-driven operation na ito.
Ayon sa CIDG, ang pagkakaaresto sa suspek at kumpiskasyon ng mga armas ay makabuluhang nakaiwas sa posibleng krimen sa hinaharap. Pinananatili ng CIDG ang kanilang paninindigan sa pagpapatupad ng batas at laban sa terorismo at ilegal na armas sa buong bansa.
