Isang negosyante ng itlog ang nasawi matapos pagbabarilin at pagnakawan ng hindi pa kilalang mga suspek sa Brgy. Kauran, Ampatuan, Maguindanao del Sur.
Kinilala ang biktima na si Nonoy Alba, residente ng Isulan, Sultan Kudarat.
Batay sa inisyal na imbestigasyon, dakong alas-8 ng umaga nang pagbabarilin ang biktima sa naturang lugar.
Bukod sa pamamaril, tinangay rin ng mga salarin ang dala niyang sling bag na hinihinalang naglalaman ng malaking halaga ng pera, gayundin ang kanyang motorsiklong ginagamit sa paghahatid ng paninda.
Patuloy ang imbestigasyon ng mga awtoridad upang matukoy ang pagkakakilanlan ng mga suspek at alamin kung may iba pang motibo sa krimen.
Hinihikayat naman ang sinumang posibleng saksi na lumapit sa pulisya upang makatulong sa paglutas ng kaso.
