Naglabas ng opisyal na pahayag si Bise Presidente Sara Z. Duterte ngayong araw ika-25 ng Marso 2026 kaugnay ng imbitasyon sa kanya na dumalo sa pagdinig ng Committee on Justice ng House of Representatives.
Sa kanyang pahayag, iginiit ni Duterte na ang kasalukuyang suliranin ng bansa ay ang paghihirap ng mga Pilipino dulot ng pagsasara ng negosyo, pagkawala ng trabaho, at patuloy na pagtaas ng presyo ng mga bilihin. Aniya, tila nagiging sentro ng atensyon ang pulitika sa halip na tugunan ang agarang pangangailangan ng mamamayan.
Tinukoy rin ng Bise Presidente na ang imbitasyon sa kanya sa pagdinig ay maaaring ginagamit upang makabuo ng “media narrative” o tinawag niyang “mini-trial,” kahit hindi umano siya sumagot o dumalo. Dagdag pa niya, nagiging bahagi umano ito ng tinatawag niyang “fishing expedition” laban sa kanya.
Iginiit ni Duterte na walang malinaw na patakaran na nag-uutos sa isang respondent na personal na dumalo sa pagdinig kaugnay ng reklamong impeachment. Sa halip, binigyang-diin niya na naisumite na niya ang kanyang “Answer ad Cautelam” at naniniwala siyang dapat nang resolbahin ng komite ang usapin batay sa ebidensya.
Sa huli, sinabi ng Bise Presidente na mas pipiliin niyang ilaan ang kanyang oras sa pagtulong sa mga Pilipino, partikular sa pagbibigay ng ayuda at direktang suporta sa mga komunidad na higit na nangangailangan.
Ang nasabing pahayag ay inilabas sa gitna ng patuloy na usapin at diskurso ukol sa reklamong impeachment at mga hakbang ng Kamara kaugnay nito.
