Naaresto ng mga awtoridad ang isang 45-anyos na lalaki sa ikinasang buy-bust operation sa Barangay Sarmiento, Parang, Maguindanao del Norte dakong alas-3:10 ng hapon noong Hunyo 16, 2025.
Batay sa ulat, ang suspek ay isang walang trabaho at residente ng nasabing barangay. Nasamsam mula sa kanya ang tatlong sachet ng hinihinalang shabu na tumitimbang ng tinatayang 11 gramo, na may halagang aabot sa ₱74,000. Kabilang din sa nakumpiska ang buy-bust money na binubuo ng isang tunay na ₱1,000 bill at 49 na piraso ng photocopied na pera.
Ang operasyon ay ikinasa ng pinagsanib na pwersa mula sa Parang Municipal Police Station (MPS), Philippine Drug Enforcement Agency (PDEA) Maguindanao del Norte, RDEU PRO BAR, 1401st RMFC-RMFB 14-A, 1st PMFC MDN, RIU 15-PIT MDN, RIAT MDN, at PIU/PDEU MDN. Pinangunahan ito ni PLT Dann Rafael Gildore at isinagawa sa ilalim ng pangangasiwa ni PMAJ Blayn M. Lomas-E.
Ayon sa imbestigasyon, bagong tukoy ang suspek bilang drug personality na umano’y aktibo hindi lamang sa Barangay Sarmiento kundi maging sa mga kalapit na lugar. Matapos ang pagkakaaresto, ipinaalam sa kanya ang kanyang mga karapatang konstitusyonal sa wikang Tagalog, bago dinala sa Parang MPS para sa kaukulang dokumentasyon at disposisyon ng mga ebidensya.
Pinuri naman ni PCOL Eleuterio M. Ricardo Jr., Provincial Director ng Maguindanao del Norte PPO, ang mga operatiba dahil sa mabilis at koordinadong aksyon. Aniya, patunay ang naturang operasyon sa patuloy na kampanya ng kanilang hanay laban sa iligal na droga. Dagdag pa ni Ricardo, mananatiling pangunahing adbokasiya ng kanilang himpilan ang pagsugpo sa mga sindikato ng droga upang mapanatiling ligtas ang mga komunidad sa lalawigan.
