Dalawampung dayuhang Chinese ang inaresto sa magkakahiwalay ngunit magkakaugnay na operasyon ng mga awtoridad sa Eastern Mindanao noong Abril 22, 2026.
Pinangunahan ng Eastern Mindanao Command o EastMinCom, katuwang ang Bureau of Immigration, ang operasyon sa Pantukan, Davao de Oro at Tagum City, Davao del Norte.
Ayon sa mga awtoridad, nahuli ang mga dayuhan dahil sa umano’y paglabag sa Philippine Immigration Act matapos umanong masangkot sa mga hindi awtorisadong gawaing pang-ekonomiya sa bansa.
Patuloy pang iniimbestigahan kung may kaugnayan ang mga naarestong dayuhan sa iligal na pagmimina at iba pang labag sa batas na operasyon. Sinusuri rin kung may koneksyon ang kanilang aktibidad sa mas malalaking transnational criminal networks.
Kasalukuyang nasa kustodiya ng Bureau of Immigration ang mga dayuhan habang isinasagawa ang beripikasyon sa kanilang mga dokumento at immigration status. Inihahanda na rin ang kaukulang deportation proceedings laban sa kanila kung mapatutunayang lumabag sila sa mga batas ng bansa.
Kasabay nito, pinag-aaralan din ng mga awtoridad ang posibleng paglabag sa Philippine Mining Act of 1995 kaugnay ng kanilang mga aktibidad.
Binigyang-diin ng EastMinCom ang patuloy nitong pangako na ipatupad ang batas, pangalagaan ang likas na yaman ng bansa, at mapanatili ang seguridad sa rehiyon. Hinikayat din nito ang publiko, mga lokal na pamahalaan, at iba pang ahensya na manatiling mapagmatyag at agad iulat ang anumang kahina-hinalang aktibidad sa kanilang mga komunidad.
