Nagbabala ang Cotabato City Disaster Risk Reduction and Management Office o CDRRMO sa publiko matapos umabot sa 42 degrees Celsius ang heat index sa Cotabato City ngayong Biyernes Agosto 14, 2026.
Ayon sa CDRRMO, nasa “Danger” level ang naturang heat index, kaya pinaalalahanan ang mga residente na mag-ingat laban sa matinding init.
Hinikayat ang publiko na uminom ng maraming tubig upang manatiling hydrated, manatili sa lilim at iwasang mabilad sa araw, partikular mula alas-diyes ng umaga hanggang alas-kuwatro ng hapon.
Pinapayuhan din ang mga residente na magsuot ng magagaan na damit, gumamit ng sombrero o sunglasses, at bawasan ang mga gawaing nangangailangan ng matinding pisikal na aktibidad sa ilalim ng araw.
Binigyang-diin din ng CDRRMO na huwag kailanman mag-iwan ng sinuman sa loob ng nakaparadang sasakyan dahil maaaring maging mapanganib ang mabilis na pag-init ng loob nito.
Kabilang sa mga senyales ng heat stroke ang pananakit ng ulo, pagkahilo, pagsusuka o pagduduwal, mabilis na pulso, pagkalito, kawalan ng pagpapawis at mataas na temperatura ng katawan.
Agad na pinapayuhang humingi ng medikal na atensyon kapag nakaranas ng mga naturang sintomas.
