Dumalo ang mga opisyal, miyembro, at tagasuporta ng United Bangsamoro Justice Party o UBJP sa isinagawang party convention kahapon, araw ng Miyerkules, Abril 30 sa Camp Darapanan Gymnasium sa kabila ng mainit na panahon.
Isinagawa ang aktibidad bilang bahagi ng paghahanda ng partido para sa nakatakdang 2026 Bangsamoro Parliamentary Elections sa Setyembre 12.
Sa pagtitipon, ipinakilala ang mga nominado at kandidatong ilalatag ng partido para sa iba’t ibang posisyon sa rehiyon.
Dumalo rin ang mga lider ng Moro Islamic Liberation Front o MILF sa pangunguna nina Chairman Ahod Ebrahim at Vice Chairman Mohagher Iqbal.
Sa kanyang talumpati, sinabi ni Iqbal na kailangang ipagpatuloy ng mga miyembro ang paghahanda para sa halalan.
Binanggit din nito ang mga nakabinbing petisyon sa Korte Suprema na may kaugnayan sa halalan ngunit iginiit na hindi dapat maantala ang paghahanda ng partido.
Sa hiwalay na pahayag, sinabi ni Ebrahim na mahalaga ang pagsasagawa ng halalan bilang bahagi ng demokratikong proseso sa Bangsamoro.
Idinagdag nito na kinakailangang mapanatili ang mga nakamit sa rehiyon sa pamamagitan ng maayos na pamamahala.
Samantala, nilinaw ng UBJP na walang tinanggal o pinalitang opisyal sa hanay ng partido.
Ayon kay UBJP Spokesperson na si Mohajirin Ali, nananatiling Secretary General si Abdulraof Macacua.
Paliwanag ni Ali, hindi kumpleto ang dokumentong kumalat online kaya hindi nakita ang pangalan ni Macacua.
Sinabi rin nito na tanging ang kusang nagbibitiw o umaalis lamang ang maaaring matanggal sa partido.
Samantala, kinumpirma ng UBJP na nakapagsumite na ito ng listahan ng mga opisyal sa Commission on Elections Law Department.
Kaugnay nito, tinukoy ng partido na mahina ang petisyong inihain laban sa kanila sa Commission on Elections en banc.
Ayon kay Ali, ang isyung tinutukoy sa petisyon ay may kinalaman sa indibidwal at hindi sa buong partido.
Inaasahan naman ng UBJP na makapaglalabas ng desisyon ang poll body bago ang filing ng certificates of candidacy sa Mayo 5 hanggang 7.
