Itinuturing na “out of time” ng Commission on Elections ang ikalawang petisyon na inihain laban sa United Bangsamoro Justice Party o UBJP kaugnay ng accreditation nito bilang regional parliamentary party.
Ito ang inihayag ni COMELEC Chairman George Erwin Garcia sa exclusive interview ng 93.7 Star FM Cotabato sa gitna ng patuloy na pagtalakay ng komisyon sa naturang usapin.
Ayon kay Garcia, matapos ang unang petisyon ay may panibago pang inihain na muli nilang inirequire ng kasagutan.
Gayunman, sinabi ng opisyal na napagpasyahan ng COMELEC na hindi na ito dapat pang pagtuunan ng pansin dahil lampas na ito sa itinakdang panahon.
Binigyang-diin pa ng chairman na may indikasyon na ginagamit ang sunod-sunod na paghahain ng petisyon bilang delaying tactics upang maantala ang desisyon ng komisyon.
Dahil dito, tiniyak ng COMELEC na hindi nila hahayaang maantala ang pagresolba sa petition for accreditation ng isang political party.
Sinabi rin ni Garcia na inaasahang kikilos ang komisyon sa loob ng linggong ito upang makapaglabas ng kaukulang desisyon.
Dagdag pa ng opisyal, kahit may mga araw na walang pasok dahil sa Labor Day at work-from-home setup, nagsagawa na ng deliberasyon at konsultasyon ang mga commissioner upang mapabilis ang pagdedesisyon.
