Isinagawa kahapon, Agosto 13, 2025, sa Dimaporo Gymnasium ng Mindanao State University (MSU) Main Campus ang makasaysayang Investiture Ceremony ni Atty. Paisalin P. D. Tago, CPA, bilang ika-9 na Pangulo ng MSU System.
Sa kanyang talumpati, binigyang-diin ni Pangulong Tago na ang seremonya ay hindi lamang simpleng panunumpa, kundi isang pagpapatibay ng sama-samang misyon at panibagong pangako na paglingkuran ang Bangsamoro, Mindanao, at ang buong bansa sa pamamagitan ng edukasyong tunay na nakakapagbago ng buhay.
Aniya, hindi nasusukat ang bigat ng tungkulin sa lawak ng nasasakupan ng MSU sa MINSUPALA, kundi sa laki ng misyon nitong maghatid ng sosyo-ekonomikong pagbabago, isama ang mga komunidad ng Muslim at katutubo sa pambansang buhay pampulitika at pang-ekonomiya, tugunan ang makasaysayang kawalang-katarungan, at magtatag ng makatarungan at pangmatagalang kapayapaan sa Bangsamoro at Mindanao.
Dagdag pa ni Tago, ang tungkuling ito ay nagsisilbing mahalagang kasangkapan ng pambansang patakaran at tagapagpasimula ng pangmatagalang pagbabago, dahilan upang maging masalimuot ngunit napakahalaga ang kanyang papel sa pamumuno sa unibersidad.
