Nagsasagawa na ng masusing imbestigasyon ang Local Government Unit (LGU) at ang Cotabato City Police Office (CCPO) upang matukoy ang pagkakakilanlan ng isang lalaki na nakuhanan ng CCTV habang umano’y nanghihikayat at humahamon ng suntukan sa mga kabataang nakaupo sa harap ng isang establisimyento.
Ayon sa ulat ng CCPO, lumabas sa mga kumakalat na CCTV footage at mga post sa social media ang insidente kung saan makikitang paulit-ulit na pinoprovoka ng naturang lalaki ang mga kabataan upang makipag-away. Sa kabila nito, pinuri ng mga awtoridad ang ipinakitang pagpipigil at mapayapang pagtugon ng mga kabataan sa harap ng naturang pang-uudyok.
Binigyang-diin ng CCPO na hindi katanggap-tanggap ang ganitong uri ng pag-uugali dahil nagdudulot ito ng banta sa kaayusan at kaligtasan ng publiko.
Sa kasalukuyan, nagsimula na ang pulisya sa pagsasagawa ng intelligence gathering at iba pang hakbang sa imbestigasyon upang matunton at makilala ang suspek.
Nanawagan naman ang mga awtoridad sa sinumang may impormasyon tungkol sa pagkakakilanlan o kinaroroonan ng lalaki na agad makipag-ugnayan sa pinakamalapit na himpilan ng pulisya o sa opisyal na hotline at social media platforms ng CCPO.
Hinikayat din ng LGU at CCPO ang mga biktima ng pampublikong pambu-bully, pananakot, o pangha-harass na makipagtulungan sa mga awtoridad upang maisagawa ang naaangkop na aksyon laban sa mga lumalabag sa batas.
Samantala, muling iginiit ng mga opisyal ang kahalagahan ng pagkakaisa ng komunidad sa pagpapanatili ng kapayapaan at kaayusan sa lungsod.
“Magtulungan tayo upang maprotektahan ang ating komunidad at mapanatili ang kapayapaan sa Cotabato City,” ayon sa pahayag ng CCPO.
