Naaresto ng Criminal Investigation and Detection Group (CIDG) ang dalawang lalaki at nakumpiska ang humigit-kumulang ₱4.1 milyon halaga ng mga produktong petrolyo sa isang operasyon sa Barangay Aguila, San Jose, Batangas, noong Pebrero 20, 2026, bandang alas-10:11 ng gabi.
Ayon sa ulat, nakumpiska sa operasyon ang isang trailer tanker na naglalaman ng 20,000 litro ng unleaded, premium, at diesel. Narekober ang mga produktong ito habang isinasagawa umano ng mga suspek na sina “Roger” at “Juan” ang tinatawag na “paihi” operation, o ang ilegal na paglilipat/panunupok ng petrolyo mula sa tanker papunta sa intermediate bulk containers na ihinahanda para sa bentahan.
Sinabi ng CIDG na ang naturang operasyon ay bahagi ng nationwide crackdown sa ilegal na kalakalan at panunupok ng petrolyo, alinsunod sa mga direktiba ni Secretary Juanito Victor “Jonvic” C. Remulla ng Department of the Interior and Local Government at ng Chief PNP Police General Jose Melencio C. Nartatez Jr.
Batay sa batas, ipinagbabawal ng Batas Pambansa Blg. 33 at ng Presidential Decree 1865 ang bentahan o distribusyon ng petrolyo para sa tubo nang walang kaukulang lisensya o pahintulot. Dahil dito, sinampahan ng kaso sa National Prosecution Service ang mga suspek sa paglabag sa PD 1865.
Sa pahayag ng CIDG, tiniyak nila ang pagpapatupad ng batas laban sa lahat ng uri ng ilegal na kalakalan at panunupok ng petrolyo sa bansa. Hinikayat ng grupo ang publiko na i-report sa CIDG ang anumang ilegal na aktibidad kaugnay ng petroleum products sa kanilang lugar upang agad itong aksyunan.
