Nagbabala ang Department of Health (DOH) ngayong Sabado na patuloy na nanganganib ang Mindanao sa measles at rubella dahil sa malaking bilang ng mga batang hindi pa nababakunahan.
Ayon sa ahensya, tinatayang higit kalahating milyon na mga bata na may edad limang taon pababa ang hindi pa nakakatanggap ng routine immunization sa rehiyon. Matapos isagawa ang Measles-Rubella at Supplemental Immunization Activity (MR-SIA) noong Biyernes, naabot lamang ng DOH ang 82% ng target nito. Plano ng ahensya na mabakunahan ang halos 2.8 milyong bata sa Mindanao at BARMM upang maabot ang 95% coverage at mapanatili ang herd immunity.
Ayon kay DOH Secretary Teodoro Herbosa, kapag marami ang hindi nabakunahan, mas mabilis kumalat ang sakit, na nagdudulot ng mas mataas na panganib ng outbreak. Binanggit din niya na ang paulit-ulit na hindi pagtupad sa vaccination targets sa mga nakaraang taon ay nagpapalala sa sitwasyon.
Pinayuhan ng DOH ang mga magulang at tagapag-alaga na tiyaking mababakunahan ang kanilang mga anak bilang proteksyon laban sa sakit. Siniguro rin ng Imam Council of the Philippines na ang mga vaccination programs ay hindi sumasalungat sa aral ng Islam, at hinihikayat ang mga magulang na ipabakuna ang kanilang mga anak.
