Nasawi ang isang 39-anyos na lalaki matapos pagbabarilin ng hindi pa nakikilalang salarin sa TV Juliano Street, Mother Barangay Rosary Heights alas-3:25 ng hapon ngayong Mayo 4, 2026.
Kinilala ang biktima na si Nicasio V. Cabañog, may asawa, job-order institutional worker, at residente ng nasabing lugar.
Batay sa paunang imbestigasyon, sakay ang biktima ng kanyang pulang XRM motorcycle at pauwi na sana nang bigla siyang lapitan at pagbabarilin ng suspek nang walang malinaw na dahilan.
Dalawang beses na pinaputukan ang biktima na tumama sa ulo gamit ang hinihinalang kalibre .45 na baril.
Agad na tumakas ang suspek patungo sa hindi matukoy na direksyon sakay ng isang Honda Click na motorsiklo.
Dead on the spot ang biktima habang inuwi naman ng kanyang pamilya ang labi nito sa kanilang tahanan.
Rumesponde ang mga tauhan ng Police Station 2 ng Cotabato City Police Office sa pangunguna ni PCPT Anuar M. Mambatao matapos makatanggap ng tawag mula sa concerned citizen.
Nakipag-ugnayan na rin ang pulisya sa mga kalapit na police stations, border control points at visibility points para sa agarang pagkakaaresto sa suspek.
Humingi na rin ng tulong ang kapulisan sa Regional Forensic Unit BAR upang magsagawa ng masusing pagsusuri sa pinangyarihan ng krimen.
Patuloy ang imbestigasyon ng mga awtoridad upang matukoy ang motibo at pagkakakilanlan ng salarin habang inaantabayanan ang karagdagang ulat.
