Ipinaliwanag ni Archbishop Charlie Malapitan Inzon, OMI, DD, ng Archdiocese of Cotabato na ang Linggo ng Palaspas ay paggunita sa matagumpay na pagpasok ni Hesus sa Jerusalem.
Ayon sa Arsobispo, sumisimbolo rin ito sa pagtanggap ni Hesus sa kanyang misyon ng pagpapakasakit, kamatayan at muling pagkabuhay.
Sinabi ni Archbishop Inzon na dito nagsisimula ang Semana Santa kung saan ginugunita ang mahahalagang pangyayari sa buhay ni Kristo.
Binigyang-diin ng Arsobispo na ang sentro ng pagdiriwang ay ang Paschal Triduum na nagsisimula sa Huwebes Santo.
Paliwanag pa nito na sa Paschal Triduum ginugunita ang paghihirap, pagkamatay at muling pagkabuhay ni Hesus na bumubuo sa pundasyon ng pananampalatayang Kristiyano.
Samantala, isinasagawa tuwing Linggo ng Palaspas ang pagbabasbas at pagwawagayway ng palaspas bilang simbolo ng pagtanggap kay Hesus.
Dagdag pa ng Arsobispo na ang mga bendisyong palaspas ay iniingatan at sinusunog upang gawing abo na ginagamit sa Ash Wednesday ng susunod na taon bilang tanda ng pagsisisi.
