Muling nasungkit ng Ministry of Environment, Natural Resources, and Energy–Lanao del Sur ang Unmodified Opinion mula sa Commission on Audit o COA-BARMM para sa taong 2025.
Ito na ang ikalawang sunod na taon na nakamit ng ahensya ang pinakamataas na audit rating matapos ang una nitong tagumpay noong 2024.
Ayon sa ulat, patunay ito ng maayos, tapat at transparent na paggamit ng pondo ng bayan ng naturang tanggapan.
Matatandaang unang nakapagtala ng clean audit opinion ang MENRE-Lanao del Sur noong 2024 sa ilalim ng pamumuno ni Provincial Director Asmarie M. Labao.
Pormal na inihayag ang pinakahuling pagkilala sa ginanap na exit conference noong Pebrero 26, 2026 at natanggap ang opisyal na audit report noong Marso 3, 2026.
Ang Unmodified Opinion ay ibinibigay kapag ang financial records ng isang ahensya ay tama, kumpleto at sumusunod sa pamantayan ng COA.
Nagpasalamat naman si Labao sa buong hanay ng MENRE-Lanao del Sur at sa mga katuwang na auditor sa patuloy na tagumpay ng ahensya.
Kasabay nito, tiniyak ng MENRE-Lanao del Sur ang pagpapatuloy ng kanilang mga programa sa pangangalaga ng kalikasan at maayos na pamamahala sa Bangsamoro region.
