Inaasahang aabot sa mahigit 200,000 katao mula sa iba’t ibang bahagi ng Bangsamoro Autonomous Region in Muslim Mindanao (BARMM) ang makikilahok sa isang peace rally na isasagawa sa Cotabato City ngayong Lunes.
Ang pagtitipon ay inorganisa ng Movement to Support Moral Governance and Fight Against Graft and Corruption. Layunin nitong isulong ang mga panawagan para sa mabuting pamamahala, transparency, pananagutan, at paglaban sa katiwalian sa rehiyon.
Ayon sa mga organizer, bahagi rin ng aktibidad ang pagpapahayag ng suporta sa kapayapaan at mga repormang itinuturing nilang mahalaga para sa patuloy na pag-unlad ng Bangsamoro. Inaasahan ding dadalo sa pagtitipon ang mga kinatawan mula sa iba’t ibang sektor at komunidad sa rehiyon.
Unti-unti nang nagsisidatingan sa Cotabato City ang mga kalahok mula sa iba’t ibang lalawigan at lungsod sa BARMM ilang oras bago ang pagsisimula ng programa. Nagsagawa rin ng kaukulang paghahanda ang mga kinauukulang ahensya upang matiyak ang kaayusan at seguridad ng pagtitipon.
Samantala, inaasahang magiging isa ito sa pinakamalalaking pampublikong pagtitipon sa lungsod ngayong taon. Patuloy namang minomonitor ng mga awtoridad ang sitwasyon upang matiyak ang maayos at mapayapang pagdaraos ng aktibidad.
