Nasa 500 na ang naitalang kaso ng Human Immunodeficiency Virus-Acquired Immunodeficiency Syndrome o HIV-AIDS sa Ministry of Health sa Bangsamoro region mula pa noong nakaraang taon.
Ito ang kinumpirma ni MOH Minister Kadil Sinolinding Jr. sa panayam kaugnay ng lumalawak na kaso ng naturang sakit sa rehiyon.
Ayon kay Sinolinding, pawang mga kalalakihan na may edad 18 hanggang 35 taong gulang ang karamihan sa mga naitalang carrier o tinamaan ng HIV-AIDS.
Dahil dito, hinikayat ng opisyal ang publiko na isabuhay ang tinatawag na ABCDS upang maiwasan ang pagkalat ng sakit.
Kabilang dito ang “A” o Abstinence, “B” o Be Faithful, “C” o paggamit ng condom tuwing nakikipagtalik, “D” o paggamit ng Anti-Retroviral Drugs, at “S” o Support of the Community upang maiwasan ang diskriminasyon laban sa mga may HIV-AIDS.
Binigyang-diin din ni Sinolinding ang kahalagahan ng due diligence at responsableng pag-uugali lalo na sa mga indibidwal na mayroon nang HIV-AIDS upang maiwasan ang lalo pang pagkalat ng sakit.
Hinimok din ng MOH-BARMM ang publiko na maging responsable sa kanilang kalusugan at sumailalim sa kaukulang konsultasyon at testing kung kinakailangan.
