Isang bangkay ng lalaki ang natagpuang nakalibing sa Sitio Odas, Barangay Tagoranao, Sultan Dumalondong, Lanao del Sur, matapos itong iulat sa pulisya bandang 11:55 ng umaga nitong Hulyo 5, 2026.
Ayon sa ulat, isang concerned citizen na kamag-anak din ng biktima ang personal na nagtungo sa Sultan Dumalondong Municipal Police Station upang ipaalam ang umano’y nakalibing na bangkay sa naturang lugar. Agad namang rumesponde ang mga pulis kasama ang imbestigador upang beripikahin ang impormasyon.
Pagdating sa lugar, nakumpirma ng mga awtoridad ang ulat at agad na isinailalim sa seguridad ang crime scene. Sa pahintulot at presensya ng mga kaanak ng biktima, isinagawa ang paghuhukay sa bangkay bandang 1:20 ng hapon.
Kinilala ng mga kaanak ang mga labi bilang kay Moslemen Calandada Pacala, nasa hustong gulang, may asawa, magsasaka, at residente ng Barangay Talaguian, Poona Bayabao, Lanao del Sur.
Sa isinagawang imbestigasyon, napag-alamang naiulat na nawawala si Pacala matapos umanong mawala sa Barangay Cabasaran, Lumbayanague, Lanao del Sur noong gabi ng Hunyo 29, 2026. Lumabas din sa imbestigasyon na ang motorsiklo ng biktima ay naunang natagpuang inabandona sa parehong lugar kung saan kalaunan ay natuklasan ang kanyang bangkay.
Matapos makilala ang mga labi, agad itong inangkin ng pamilya upang mailibing alinsunod sa mga ritwal at tradisyong Islam.
Patuloy naman ang follow-up investigation ng Sultan Dumalondong Municipal Police Station, sa pakikipag-ugnayan sa Lumbayanague Municipal Police Station at sa pamilya ng biktima, upang matukoy ang mga suspek at maisampa ang naaangkop na kasong kriminal.
