Ayon sa DOST-PAGASA S&T Media Service, isang total lunar eclipse ang magaganap sa Marso 3, 2026, at makikita sa Maynila at iba pang bahagi ng Pilipinas sa loob ng tinatayang 59 minuto at 24 segundo.
Batay sa pahayag ng ahensya, ang total lunar eclipse ay magiging ganap na visible din sa Eastern Asia, Australia, Central Pacific, at karamihan ng mga bansa sa Americas. Ang pinakamataas na yugto ng eclipse ay inaasahang mangyayari bandang 7:34 PM, habang magsisimula ang kabuuang eclipse o totality ng buwan sa 7:04 PM.
Sa panahon ng maximum eclipse, ang Umbral shadow ng Earth ay tuluyang tatakip sa buong disk ng buwan. Kilala rin ang fenomenong ito bilang “Blood Moon” dahil nagmumukhang pula ang buwan sa oras ng eclipse, bunga ng paraan ng pag-filter at pag-scatter ng liwanag ng araw ng atmospera ng mundo.
Binigyang-diin ng PAGASA na madaling obserbahan ang total lunar eclipse. Bagama’t makatutulong ang simpleng binoculars para mas malinaw makita ang ibabaw ng buwan, hindi ito kinakailangan. Hindi tulad ng solar eclipse, ang pag-obserba ng lunar eclipse ay ganap na ligtas at hindi nangangailangan ng protective eyewear.
