Kinondena ng Non-Moro Indigenous Peoples Youth Network o NMIPYN ang magkakasunod na pamamaril sa mga kasapi ng pamayanang Teduray sa Maguindanao del Sur at nanawagan ng agarang imbestigasyon, pananagutan at mas mahigpit na proteksiyon para sa mga katutubong mamamayan.
Ayon sa organisasyon, binaril at napatay si Barangay Kagawad Joel M. Magtud noong Oktubre 17, 2026, sa Barangay Maitumaig, Datu Unsay, Maguindanao del Sur.
Kinagabihan naman ng Oktubre 18, dakong alas-11:52, binaril din sa parehong lugar sina Sayrel Guiaman Tomas, na nasawi, at Jayjay Guiaman, na nagtamo ng malubhang pinsala.
Dahil dito, hiniling ng NMIPYN sa Bangsamoro Human Rights Commission at Philippine National Police na magsagawa ng masusing imbestigasyon, matukoy ang mga responsable at matiyak na mapapanagot ang mga ito alinsunod sa batas.
Nanawagan din ito sa mga lokal at panlalawigang pamahalaan na palakasin ang mga hakbang sa seguridad at makipag-ugnayan sa mga apektadong pamayanang katutubo.
Hinimok din ng organisasyon ang Office of the Presidential Adviser on Peace, Reconciliation and Unity na pabilisin ang pagbuo ng panukalang mekanismo para sa proteksiyon ng mga Non-Moro na Katutubong Mamamayan sa Bangsamoro.
Ayon pa sa NMIPYN, tinatayang halos 110 na ang mga naiulat na pagpatay sa mga Non-Moro na Katutubong Mamamayan, bagama’t kailangan pa itong maayos na maidokumento at malayang mapatunayan.
Kasabay nito, nanawagan ang grupo ng angkop na gamutan at patuloy na pangangalaga para kay Jayjay Guiaman, gayundin ng hustisya para sa mga nasawi at proteksiyon para sa mga apektadong komunidad.
