Pansamantalang sinuspinde ang ilang engagement sa implementasyon ng Comprehensive Agreement on the Bangsamoro o CAB ayon sa opisyal na pahayag ng pamunuan ng MILF.
Ayon kay UBJP Spokesperson at MILF Information Officer Engr. Mohajirin Ali, ang hakbang ay kaugnay ng pagbibitiw ng chairperson ng GPH Peace Implementing Panel.
Sinabi ni Ali na nagdudulot ito ng kakulangan sa gabay para sa mga mekanismo na nagpapatupad ng kasunduan sa pagitan ng gobyerno at MILF.
Nanawagan ang kanilang hanay sa pambansang pamahalaan na agad magtalaga ng isang full-fledged panel chair na may sapat na mandato at awtoridad.
Giit pa ni Ali, mahalaga ang naturang posisyon upang matiyak ang maayos at tuloy-tuloy na implementasyon ng mga napagkasunduan.
Nilinaw naman ng opisyal na hindi nangangahulugan ng disengagement ng MILF sa peace agreement ang naturang pansamantalang paghinto.
Binigyang-diin din na magpapatuloy ang mandato ng mga umiiral na mekanismo tulad ng ceasefire bodies at iba pang joint structures.
Kaugnay nito, sinabi ni Ali na hindi maaapektuhan ang political track o ang nalalapit na halalan sa Bangsamoro.
Inaasahan aniya na matutuloy ang eleksyon sa Setyembre kung mapipirmahan ang kinakailangang resolusyon at walang magiging hadlang mula sa Korte Suprema.
Sa panig ng UBJP, patuloy na ang kanilang paghahanda para sa eleksyon kabilang ang pagsunod sa mga requirements ng COMELEC.
Tiniyak naman ni Ali na nananatiling nakatuon ang MILF sa mapayapang implementasyon ng kasunduan at hindi babalik sa armadong tunggalian.
