Patuloy ang isinasagawang dredging program ng Pamahalaang Panlalawigan ng Maguindanao del Sur mula noong April 13 hanggang 17, 2026, na unang ipinatupad sa Poblacion, General Salipada K. Pendatun at ngayon ay pinalalawak na rin sa iba pang karatig-lugar kabilang ang bayan ng Paglat.
Ayon sa ulat, layunin ng naturang operasyon na linisin at palalimin ang mga daluyan ng tubig upang maiwasan ang pagbabara na maaaring magdulot ng pagbaha sa mga komunidad, lalo na tuwing may malalakas na pag-ulan.
Isinasagawa ang proyekto sa pangunguna ng Pamahalaang Panlalawigan sa ilalim ng liderato ni Governor Datu Ali Midtimbang, katuwang ang mga lokal na pamahalaan sa mga apektadong bayan.
Sinabi ng mga awtoridad na bahagi ito ng mas pinaigting na disaster risk reduction and management efforts na naglalayong protektahan ang buhay, kabuhayan, at mga ari-arian ng mga residente.
Sa pamamagitan ng tuloy-tuloy na operasyon, inaasahang mas mapapalakas ang kahandaan ng mga komunidad sa posibleng epekto ng pagbabago ng klima at masamang panahon.
Patuloy namang isinasagawa ang koordinasyon ng mga lokal na pamahalaan upang matiyak ang maayos na implementasyon ng programa sa mga susunod pang lugar na saklaw ng operasyon.
