Patuloy na nakaaapekto ang localized thunderstorms sa buong Bangsamoro Autonomous Region in Muslim Mindanao o BARMM, ayon sa pinakahuling weather outlook.
Inaasahan ang bahagyang maulap hanggang maulap na kalangitan na may kalat-kalat na pag-ulan, pagkulog, at pagkidlat sa buong rehiyon, kabilang ang Cotabato City, Maguindanao del Norte, Maguindanao del Sur, Lanao del Sur, Basilan, at Tawi-Tawi.
Nagbabala rin ang mga weather forecaster sa posibilidad ng biglaang pagbaha at pagguho ng lupa sa mga lugar na makararanas ng katamtaman hanggang malakas na pag-ulan.
Samantala, inaasahang iihip ang mahina hanggang katamtamang hangin mula sa timog hanggang timog-kanluran, habang magiging bahagya hanggang katamtaman ang taas ng alon sa mga karagatang sakop ng rehiyon.
Pinapayuhan ang publiko na manatiling alerto, lalo na ang mga naninirahan sa mabababang lugar at mga komunidad na malapit sa kabundukan, at patuloy na subaybayan ang mga susunod na weather advisories ng PAGASA.
