Pormal na nanumpa sa tungkulin ang mga bagong itinalaga at napromote na empleyado ng Ministry of Public Order and Safety (MPOS)-BARMM sa isinagawang 6th MPOS Mass Oath-Taking Ceremony noong Hulyo 16 sa Alnor Convention Hall sa Cotabato City.
Dinaluhan ang programa ng mga opisyal ng MPOS, mga empleyado, bagong kawani, at kanilang mga pamilya bilang paggunita sa isa na namang mahalagang yugto sa pagpapalakas ng hanay ng mga lingkod-bayan ng ministeryo.
Sa kanyang mensahe, hinikayat ni Administrative and Finance Division Chief Jalam S. Lingasa ang mga nanumpang kawani na gampanan ang kanilang tungkulin nang may dedikasyon, integridad, at katapatan sa paglilingkod sa mamamayang Bangsamoro.
Samantala, binigyang-diin ni MPOS Minister Hussein P. Muñoz na ang panunumpa ay hindi lamang pormal na seremonya kundi isang paalala ng moral na pananagutan ng bawat lingkod-bayan. Aniya, nararapat na pairalin ng mga kawani ang katapatan, malasakit, at pananagutan sa bawat serbisyong kanilang ibibigay sa publiko.
Nagpasalamat naman ang isa sa mga napromote na empleyado na si Peace Program Officer IV Mervin Ray Elino sa tiwalang ipinagkaloob sa kanya ng pamunuan. Nangako rin siyang patuloy na gagampanan ang kanyang mga tungkulin nang may sipag at katapatan.
Sa pagtatapos ng programa, muling binigyang-diin ng pamunuan ng MPOS ang kahalagahan ng pagkakaisa, propesyonalismo, at mahusay na paglilingkod upang higit pang mapalakas ang paghahatid ng mga serbisyo sa buong Bangsamoro.
Nagtapos ang aktibidad sa pagkilala sa mga natatanging opisyal at empleyado ng ministeryo bilang bahagi ng pagdiriwang ng MPOS Day 2026, bilang pagkilala sa kanilang dedikasyon at ambag sa pagpapalakas ng serbisyo publiko.
