Isang 15-taong gulang na dalagita ang binaril at napatay ng hindi pa nakikilalang salarin sa Purok 1, Brgy. Kaya-Kaya, Datu Abdullah Sangki, Maguindanao del Sur, madaling-araw kanina.
Kinilala ang biktima bilang si alyas Monera, isang estudyante at residente ng Brgy. Dapantis, Rajah Buayan.
Ayon sa mga inisyal na ulat, nasa labas ng bahay ng kanyang kasintahan ang biktima nang lapitan siya ng isang lalaking sakay ng motorsiklo at biglang pagbabarilin. Tinamaan siya sa ulo, na agad niyang ikinamatay, habang nakaligtas naman ang kanyang kasintahan.
Isa sa mga posibleng motibo sa krimen na iniimbestigahan ng mga awtoridad ay ang love triangle, ngunit patuloy pang sinisiyasat ang iba pang anggulo upang matukoy ang salarin at ang tunay na dahilan ng pamamaril.
