Aabot sa 1,670 Bangsamoro college students ang makatatanggap ng tig-P80,000 financial assistance ngayong taon sa ilalim ng Access to Higher and Modern Education Scholarship Program o AHME-SP ng Ministry of Basic, Higher, and Technical Education o MBHTE.
Gagamitin ang scholarship assistance para sa mga gastusing may kaugnayan sa kanilang pag-aaral bilang bahagi ng ikapitong cohort ng programa para sa Academic Year 2026-2027.
Sa 698 scholars na nanumpa sa Cotabato City, 224 ang mula sa Maguindanao del Sur, 224 mula sa Maguindanao del Norte, 125 mula sa Special Geographic Area o SGA at 125 mula sa Cotabato City.
Makakatanggap ang bawat scholar ng P40,000 kada semestre o kabuuang P80,000 para sa dalawang semestre.
Kabilang sa mga benepisyaryo si Jawlah Lakman Kanapia, 19-anyos na Bachelor of Science in Nursing student ng Notre Dame Hospital Siena College of Cotabato.
Ayon kay Kanapia, malaking tulong ang scholarship upang maipagpatuloy niya at ng iba pang benepisyaryo ang kanilang pag-aaral at maabot ang kanilang mga pangarap.
Nagsimula ang AHME-SP noong 2020 at nakalaan para sa mga kwalipikadong Bangsamoro students na kabilang sa mga decommissioned combatants, kanilang mga anak, mga ulila o surviving spouses, bilang bahagi ng post-conflict rehabilitation and development efforts ng Bangsamoro government.
Binigyang-diin naman ni Atty. Dayang Akirah Sansarona ng MBHTE ang pagiging inclusive ng scholarship program, kung saan dumaan umano sa parehong proseso ng pagsusuri at pagpili ang lahat ng aplikante.
Hinimok naman ni Marjuni Maddi, MBHTE Director-General for Higher Education, ang mga scholars na seryosohin ang kanilang pag-aaral at magpatuloy sa kabila ng mga hamon sa kolehiyo.
Sinabi ni Maddi na dapat alalahanin ng mga scholars ang dahilan kung bakit nila sinimulan ang kanilang pag-aaral at ang mga taong naniniwalang karapat-dapat paglaanan ng puhunan ang kanilang edukasyon.
