Nabigyan ng shelter kits kasunod ng mga pinsalang dulot ng lindol at sunog ang ahigit 80 pamilya sa Mati City.
Layunin ng inisyatibo na matulungan ang mga residente na muling makapagtayo ng ligtas at matibay na tirahan.
Kasabay nito, inilunsad din ang programang pangkabuhayan na nakatuon sa digital skills upang makatulong sa kanilang pang-araw-araw na kita.
Dalawampu’t anim na indibidwal, kabilang ang mga magulang, kawani ng gobyerno, at senior citizens, ang sinanay bilang digital ambassadors.
Tinuturuan ang mga ito na magpatakbo ng maliliit na digital retail business tulad ng mobile loading at iba pang serbisyong online.
Kabilang din sa pagsasanay ang kaalaman sa mobile commerce, financial management, at entrepreneurship upang magkaroon ng pangmatagalang pagkakakitaan.
Isinagawa rin ang information drive hinggil sa online safety, data privacy, at responsableng paggamit ng teknolohiya.
Pinagtibay din ang kampanya laban sa online sexual abuse at exploitation ng mga bata upang maprotektahan ang mga vulnerable na sektor.
Ayon sa lokal na pamahalaan, mahalaga ang pagsasabay ng disaster response at digital education upang mas maging matatag ang komunidad sa hinaharap.
Naging posible ang programa sa tulong ng donasyon ng mahigit 200,000 subscribers at suporta ng lokal na pamahalaan ng Mati.
Ang inisyatibo ay pinangunahan ng Globe, Ayala Foundation, at Makati Development Corporation bilang bahagi ng kanilang community development efforts.
