Nagbigay ng mensahe si Moro Islamic Liberation Front (MILF) Central Committee Chairman at United Bangsamoro Justice Party (UBJP) President Al Haj Murad Ebrahim kaugnay ng pagdiriwang ng Eid’l Adha 1447 AH, kung saan binigyang-diin nito ang kahalagahan ng sakripisyo, pananampalataya at pagkakaisa sa gitna ng mga hamon na kinakaharap ng komunidad.
Sa kanyang pahayag, sinabi ni Ebrahim na ang pagdiriwang ng Eid’l Adha ay paalala ng kahalagahan ng pagtalima sa pananampalataya at ng diwa ng pagsasakripisyo na itinuturing na mahalagang bahagi ng paggunita sa isa sa mga pangunahing kapistahan sa Islam.
Binigyang-diin din nito na ang okasyon ay nagsisilbing pagkakataon upang pagnilayan ang mga naging pagsubok na naranasan ng mamamayan, kabilang ang epekto ng mga sigalot, kalamidad at suliraning pangkabuhayan sa mga nagdaang taon.
Ayon pa sa kanya, mahalaga rin ang pagtutulungan at pagbabahaginan upang makatulong sa mga nangangailangan at higit na mapatatag ang samahan sa komunidad.
Hinimok din ni Ebrahim ang publiko na patuloy na isulong ang pagkakaisa, pagpapalakas ng pananampalataya at sama-samang pagkilos tungo sa kapayapaan at kaunlaran sa Bangsamoro.
Kasabay nito, nagpaabot siya ng pagbati sa pagdiriwang ng Eid’l Adha sa mga Muslim sa bansa at sa iba’t ibang panig ng mundo.
