Arestado ang dalawang lalaki matapos umanong tangkain na dukutin ang isang 63-anyos na mangingisda sa Barangay Buayan, Datu Piang, Maguindanao del Sur ngayong hapon ng Huwebes, Mayo 28, 2026.
Kinilala ang biktima na si Dhats Nok Batingcay, residente ng Barangay Magaslong, Datu Piang.
Sa ulat ng pulisya, naganap ang insidente bandang alas-5:40 ng hapon habang minamaneho ng biktima ang kanyang “payong-payong” at pansamantalang huminto sa gilid ng highway matapos makatanggap ng tawag sa telepono mula sa isang dating barangay kagawad.
Dito umano huminto malapit sa kanya ang isang Toyota Vios, kung saan bumaba ang dalawang suspek at tinangka siyang puwersahang isakay sa sasakyan.
Nagawang makapanlaban at makatakas ng biktima bago humingi ng saklolo sa mga kalapit na residente.Matapos ang insidente, mabilis na tumakas ang mga suspek patungong bayan ng Datu Salibo.
Agad namang nagsagawa ng hot pursuit operation ang mga tauhan ng Datu Piang Municipal Police Station sa pakikipag-ugnayan sa Datu Salibo Municipal Police Station na nagresulta sa pagkakaaresto sa dalawang suspek sa nasabing bayan.
Kinilala ang mga naaresto na sina alyas Jayson, residente ng Digos City, at alyas Jobn, residente ng Sultan Naga Dimaporo, Lanao del Norte.
Patuloy pang inaalam ng mga awtoridad ang motibo sa tangkang pagdukot.
Dinala ang mga naarestong suspek sa Datu Piang Municipal Police Station para sa kaukulang dokumentasyon at disposisyon.
Nakipag-ugnayan na rin ang pulisya sa 38th Infantry Battalion ng Philippine Army at mga kalapit na himpilan ng pulisya kaugnay sa insidente.
