Dalawang Chinese national ang inaresto ng mga awtoridad matapos madiskubre ang umano’y hindi awtorisadong operasyon ng pagpoproseso ng ginto sa bayan ng Sibutad, Zamboanga del Norte.
Isinagawa ang operasyon noong Marso 3, 2026 sa pamamagitan ng magkasanib na puwersa ng Bureau of Immigration at Sibutad Municipal Police Station, na sinuportahan ng mga tauhan ng Philippine Army sa ilalim ng Joint Task Force ZAMPELAN, kabilang ang 102nd Infantry Brigade at 97th Infantry Battalion.
Ayon sa Bureau of Immigration, ipinatupad ang Mission Order No. 2026-089 laban sa dalawang dayuhan dahil sa paglabag sa Section 37(a)(7) ng Philippine Immigration Act of 1940. Lumalabas sa imbestigasyon na sila ay nag-overstay at nagsagawa ng negosyo nang walang kaukulang visa at permit.
Kinilala ang mga naaresto na sina Tao Zhang, 59 anyos mula Shaanxi Province, at Chenggong Zhang, 41 anyos mula Hubei Province, kapwa mga mamamayan ng China. Natuklasan umano ang dalawa habang nagpapatakbo ng isang gold ball milling facility na ginagamit sa pagproseso ng mineral ore, isang aktibidad na maaaring maituring na ilegal kapag walang sapat na permit at hindi sumusunod sa mga umiiral na regulasyon.
Nabatid na unang napansin ng mga awtoridad ang presensya ng mga dayuhan sa lugar sa pamamagitan ng patuloy na monitoring at environmental scanning sa loob ng Joint Operational Area ng Joint Task Force ZAMPELAN. Binigyang-diin ng mga opisyal na ang hindi reguladong pagpoproseso ng mineral ay maaaring magdulot ng seryosong epekto sa kapaligiran tulad ng pagkasira ng lupa, kontaminasyon ng tubig, at panganib sa kaligtasan ng komunidad.
May mga nauna ring ulat mula sa ilang residente kaugnay sa kondisyon ng pasilidad at usapin sa bayarin sa renta sa may-ari ng lupang kinatitirikan nito.
Ayon sa mga awtoridad, bahagi ang operasyon ng mas pinaigting na kampanya ng pamahalaan upang maprotektahan ang likas na yaman ng bansa laban sa ilegal at hindi kontroladong pagmimina at pagpoproseso ng mineral. Iginiit nila na ang sinumang dayuhan na nagnanais magsagawa ng negosyo sa Pilipinas ay kailangang sumunod sa immigration, environmental, at iba pang kaukulang batas.
Sa kasalukuyan, nasa kustodiya na ng Bureau of Immigration ang dalawang dayuhan at sasailalim sa nararapat na legal na proseso. Tiniyak naman ng mga awtoridad na magpapatuloy ang kanilang operasyon at pagbabantay upang agad matukoy at masawata ang anumang kahalintulad na ilegal na aktibidad sa rehiyon.
Via 1st Infantry “Tabak” Division
